திங்கள், ஏப்ரல் 24, 2017

தொண்டி கோவிந்தராசு என்கவுன்டர் படுகொலை உண்மை அறியும் குழு அறிக்கை

தொண்டி கோவிந்தராசு என்கவுன்டர் படுகொலை

 உண்மை அறியும் குழு அறிக்கை

 

மதுரை,
ஏப்ரல் 22, 2017




   இராமநாதபுரம் மாவட்டம் தொண்டி அருகே உள்ள உசிலன்கோட்டை கிராமத்தைச் சேர்ந்த விறகு மற்றும் கரி வியாபாரம் செய்யும் கோவிந்தன் எனப்படும் கோவிந்தராசு (42) என்பவர் கடந்த ஏப்ரல் 13 அன்று இரவு இராமநாதபுரம் நகர் B2 காவல் நிலைய சார்பு ஆய்வாளர் (SI) தங்க முனியசாமி என்பவர் தலைமையில் சென்ற மூன்று பேர் அடங்கிய குழுவால் சுட்டுக் கொல்லப்பட்டது அப்பகுதியில் கடந்த பத்து நாட்களாகப் பரபரப்பான செய்தியாக உள்ளது. கோவிந்தனின் குடும்பத்தார் அவரது உடலைப் பெற்றுக்கொள்ள மறுத்துள்ள நிலையில் அவரது உடல் தற்போது இராமநாதபுரம் மாவட்ட மருத்துவமனையில் வைக்கப்பட்டுள்ளது. இது அப்பகுதியில் பரபரப்பான பிரச்சினையாக உள்ளதோடு இது ஒரு சாதிப் பிரச்சினையாகவும் உருப்பெறக்கூடிய நிலை உள்ளதை ஊடகங்களின் மூலம் அறிந்த நாங்கள் ஒரு உண்மை அறியும் குழுவை அமைத்து நேற்று முழுவதும் இப்பகுதியில் பலரையும் சந்தித்தோம்.

எம் குழு உறுப்பினர்கள்:

       1.பேரா.அ.மார்க்ஸ், தேசிய மனித உரிமை அமைப்புகளின் கூட்டமைப்பு
  1. வழக்குரைஞர் ரஜினி, மதுரை,
  2. வழக்குரைஞர் ஏ.செய்யது அப்துல் காதர் (NCHRO), மதுரை,
  3. வழக்குரைஞர் எம். காஜா நஜ்முதீன் (NCHRO) , மதுரை,
      5, வழக்குரைஞர் என்.எம்.ஷாஜஹான், (NCHRO), மதுரை,
  1. மு.சிவகுருநாதன், சமூக ஆர்வலர், திருவாரூர்,
  2. கு.பழனிச்சாமி, சமூக ஆர்வலர், மதுரை

          இக்குழுவினர் நேற்று முழுவதும் உசிலன்கோட்டை, தொண்டி, இராமநாதபுரம், பரமக்குடி ஆகிய பகுதிகளில் இது தொடர்பாகப் பலரையும் சந்தித்துப் பேசியது. நாங்கள் சந்தித்தவர்கள்: கோவிந்தனின் மனைவி பவானி (34), அவரது மகள்கள் பாண்டியம்மாள் (19), மோனிஷா (17), தனலட்சுமி (14), சகோதரர்கள் குமார் மற்றும் கண்ணன், தந்தை பாலு, தாய் காளியம்மாள், சகோதரி ஜெயந்தி, என்கவுன்டரில் கொலை செய்தவர்களும் தற்போது இராமநாதபுரம் மருத்துவமனையில் சிகிச்சை பெற்று வருபவர்களுமான எஸ்.ஐ .தங்கமுனியசாமி குழுவினர், இராமநாதபுரம் காவல்துறை கண்காணிப்பாளர் என்.மணிகண்டன். பரமக்குடி வழக்குரைஞர் சி.பசுமலை ஆகியோர் உட்படப் பலரையும் சந்தித்தனர். எமது வழக்குரைஞர்கள் அப்துல் காதர், காஜா நிஜாமுதீன் இருவரும் இராமநாதபுரம் சிறைக்குச் சென்று அங்கு சிறைவைக்கப்பட்டுள்ள துல்கருனை, சின்ராஜ் ஆகியோரை மனு போட்டு சந்தித்துப் பேசியபோது தங்களுக்குக் காவல்துறையினரே வக்கீலுக்கு ஏற்பாடு செய்துள்ளதாகவும் தாங்கள் அவர்களுடன் பேச முடியாது எனவும் கூறினர். கேணிக்கரைக் காவல் நிலையத்துக்குச் சென்று விசாரித்தபோது இப்போது பஜார் காவல்நிலைய ஆய்வாளர் வெங்கடேசன் என்பவரே அதற்கும் பொறுப்பாக உள்ளார் என்றனர். அங்கு சென்றும் அவரைச் சந்திக்க முடியவில்லை. இன்று காலை தொலைபேசியில் அவரிடம் பேசினோம்.




சம்பவம்: 

     கோவிந்தன் தேவேந்திரகுல வேளாளர் எனும் தலித் சமூகத்தைச் சேர்ந்தவர். இவரது சகோதரர் பாண்டித்துரை என்பவர் 1997 -ல் மறவர் சமூகத்தைச் சேர்ந்தவர்களால் கொல்லப்படுகிறார். இப்பகுதியில் இவ்விரு பிரிவினருக்கும் இடையில் சாதிப் பகை இருப்பது அனைவரும் அறிந்ததே. கோவிந்தன் சாதிப் பிரச்சினையில் கொல்லப்பட்ட பசுபதி பாண்டியனின் தமிழ்நாடு தேவேந்திரகுல வேளாளர் கூட்டமைப்பின் மாவட்டப் பொறுப்பாளராக இருந்தவரும் கூட. பாண்டித்துரையின் கொலைக்குக் காரணமானவர் எனக் கருதப்பட்ட மறவர் சமூகத்தைச் சேர்ந்த ஒருவர் 1998ல் கொல்லப்பட்டதை ஒட்டி கோவிந்தன் உட்பட 56 பேர் மீது வழக்கு தொடரப்பட்டது. எனினும் இறுதியில் கோவிந்தன் விடுதலை செய்யப்பட்டார். 

       தொடர்ந்து கோவிந்தன் அப்பகுதியில் சாதி மோதல்களில் தலையிட்டு பஞ்சாயத்து செய்பவரானார், இதை ஒட்டி அவர் மீது சில வழக்குகளும் உண்டு. சென்ர ஆண்டில் பழையனக்கோட்டையைச் சேர்ந்த மறவர் சமூகத்தினர் சிலர் சென்ற ஆண்டு கோவிந்தன் வீட்டில் இருந்தபோது அவரைத் தாக்க வந்ததாகவும் கோவிந்தன் அவர்களை அடித்து விரட்டி இருவரைப் பிடித்து வைத்ததாகவும் இதை ஒட்டி அவர் மீது ஒரு கொலை வழக்கு பதிவு செய்யப்பட்டதாகவும் அவரது வீட்டார் கூறினர். காவல்துறை கண்காணிப்பாளரைச் சந்தித்தபோது கோவிந்தன் மீது இப்படி மூன்று வழக்குகள் உள்ளன என்றார். எனினும் அவர் மீது கொள்ளை மற்ரும் வழிப்பறி தொடர்பான வழக்குகள் அல்லது குற்றச்சாட்டுகள் ஏதும் இல்லை என்பதை அவரது வீட்டாரும் பிறரும் உறுதிபடக் கூறினர்.

       சென்ற 13 ம் தேதி மாலை 6.30 மணி அளவில் சாதாரண உடையில் வந்த சிலர் கோவிந்தனை ஏதோ விசாரிக்க வேண்டும் என அழைத்துச் சென்றதாகவும் நாண்ட நேரம் அவர் வராததை ஒட்டி சில மணி நேரம் கழித்து அவரது மனைவி செல்போனில் தொடர்பு கொண்டபோது அடுத்த நாள் வருடப் பிறப்பிற்கு பூ, பழங்கள் வாங்கிக் கொண்டு வருவதாகவும் கூறியுள்ளார். எனினும் இரவு பத்தரை மணிக்குப் பின் அவரைத் தொடர்பு கொண்டபோது அவரிடமிருந்து பதில் ஏதும் இல்லை. செல்போனை யாரும் எடுக்கவில்லை என அவரது மனைவி கூறினார். காலை 5 மணி அளவில்தான் அவர் என்கவுன்டரில் கொல்லப்பட்ட செய்தி வீட்டாருக்குத் தெரிய வந்துள்ளது.



    இது ஒரு பச்சைப் படுகொலை எனக் கூறி அவரது உடலை வீட்டார்கள் வாங்க மறுத்து வருகின்றனர். இதற்கிடையில் நெருங்கிய உறவினர்கள் யாரும் இல்லாமல் அவரது உடல் பிரேத பரிசோதனை செய்யப்பட்டுள்ளது. இரண்டு நாள் முன்னர் கோவிந்தனின் வீட்டுக்கு வந்த போலீசார் கோவிந்தனின் உடல் மார்ச்சுவரியில் அழுகிக் கிடப்பது சுகாதாரக் கேடு உட்படப் பல பிரச்சினைகளை ஏற்படுத்துகிறது எனவும் உடனடியாக உடலை எடுத்துச் செல்லாவிடால் தாங்களே எரியூட்டி விடுவதாகவும் எச்சரித்து ஒரு அறிக்கையை ஏப்ரல் 19 அன்று வீட்டுச் சுவர்களில் ஒட்டிச் சென்றுள்ளனர். குடும்பத்தார் மீது இது தொடர்பாக நடவடிக்கை எடுக்கப்படும் எனவும் கூறப்பட்டுள்ளது.  தொடர்ந்து அவர்கள் கண்காணிக்கப்படுவதும், அடிக்கடி போலீஸ் வாகனம் வந்து செல்வதாகவும், தாங்கள் தொடர்ந்து காவல்துறையால் மிரட்டப்படுவதாகவும் இது தங்களுக்கு அச்சத்தை ஊட்டி நிம்மதியைக் குலைப்பதாகவும் அவர்கள் கூறினர்.

       சி.பி.ஐ விசாரணை, மறு பிரேத பரிசோதனை ஆகியவற்றைக் கோரி நீதிமன்றத்தை அணுகியபோது அவற்றை நீதிமன்றம் மறுத்துள்ளது. மாஜிஸ்ட்ரேட் முன்னிலையில்தான் பிரேத பரிசோதனை செய்யப்பட்டுள்ளது என்பதையும், வழக்கு இப்போது சி.பி.சி.ஐ.டி க்கு மாற்றப்பட்டுள்ளது என்பதையும் நீதிமன்றம் காரணமாகச் சொல்லியுள்ளது.

     தாங்களே கோவிந்தனின் உடலை எரித்துவிடுவதாகக் காவல்துறை அவரது வீட்டில் எச்சரிக்கை நோட்டீஸ் ஒட்டியது குறித்து கோவிந்தனின் மனைவி அடுத்த நாள் (ஏப்ரல் 21) உயர்நீதி மன்றத்தை அணுகினார். தற்போது அதற்குத் திங்கட்கிழமை வரை (ஏப் 24) தற்காலிகத் தடை விதிக்கப்பட்டு அதிகாரிகளிடம் அது தொடர்பாக விளக்கம் கோரப்பட்டுள்ளது.

காவல்துறை சொல்வது: 

    தொண்டி காவல் நிலையத்தில் பதிவுசெய்யப்பட்டுள்ள முதல் தகவல் அறிக்கையின்படி (எண் 111/17, தேதி ஏப்ரல் 14, 2017) இ.த.ச 279, 294(b), 332, 307, குற்ற நடவடிக்கைச் சட்டம் 176 ஆகிய பிரிவுகளின் கீழ் வழக்கு பதிவு செய்யப்பட்டுள்ளது.

     தொண்டியைச் சேர்ந்த காசிநாதன் என்பவர் சங்கு வகைகள், கடல் ஆமை  முதலான தடை செய்யப்பட்ட பொருள்களை விற்கும் ஒரு வணிகர் எனக் கூறப்படுகிரது. இவர் சென்ற 11ம் தேதி தனது காரில் 9 இலட்ச ரூபாய்  பணத்துடன் வந்து கொண்டிருந்தபோது வழிமறித்த கோவிந்தன் அவரைத் தாக்கி பணத்தை எடுத்துக் கொண்டு ஓடினார், இது குறித்து காசிநாதன் இரண்டு நாள் கழித்து 13-ம் தேதி இராமநாதபுரம் கேணிக்கரைக் காவல் நிலையத்தில் வழக்கொன்றைப் பதிவு செய்தார் (குற்ற எண் 291/17, பிரிவுகள் இ.த.ச 341, 395, 397,365). தனது ஓட்டுனர் தொண்டியைச் சேர்ந்த துல்கருணை என்பவர் மூலம் தான் பணம் கொண்டுவருவதை அறிந்து கோவிந்தன் இந்த வழிப்பறியைச் செய்ததாக அதில் குற்றம் சாட்டப்பட்டுள்ளது. 

      உடனடியாக இராமநாதபுரம் உட்கோட்ட உதவிக் காவல் கண்காணிப்பாளர் பிறப்பித்த உத்தரவின்படி இராமநாதபுரம் B2 நகரக் காவல் நிலையச் சார்பு ஆய்வாளர் தங்கமுனியசாமி  கேணிக்கரை பொறுப்பு காவல் ஆய்வாளர் கணேசனுக்கு உதவியாக சௌந்தரபாண்டியன், மோகன், மாரிமுத்து மற்றும் ஆயுதப்படைக் காவலர்கள் சுரேஷ்  பண்டியன், ராஜேஷ் கண்ணன் ஆகியோருடன் ஆஜராகியதாக தங்க முனியசாமி மேற்கண்ட முதல் தகவல் அறிக்கையில் (தொண்டி 111/17) கூறுகிறார். துல்கர்னையை விசாரித்தபோது அவர் குற்றத்தை ஒப்புக் கொண்டு தன்பங்காக கோவிந்தனால் கொடுக்கப்பட்ட ரூ 80,000 த்தை ஒப்படைத்ததாகவும். பின் ஒரு இன்டிகா காரை (TN 65 6361) வாடகைக்கு எடுத்துக் கொண்டு துல்கருனையை அழைத்துக் கொண்டு சென்றபோது கோவிந்தன் துல்கருனைக்குப் போன் செய்து சின்ராஜிடம் மேலும் 60,000 ரூ கொடுத்து அனுப்புவதாகவும் அதைப் பெற்றுக்கொண்டு போய்விடு எனச் சொன்னாராம். 

    சற்று நேரத்தில் சின்ராஜ் அந்தப் பணத்தைக் கொண்டு வந்தாராம். தங்கமுனியசாமி குழுவினர் சின்ராஜையும் பிடித்து அழைத்துக் கொண்டு கோவிந்தனைத் தேடிச் சென்றார்களாம். தொண்டியிலிருந்து திருவாடனை நோக்கி அம்பாசடர் கார் ஒன்றில் சென்று கொண்டிருந்த கோவிந்தனை மடக்கியபோது அவர் தன் காரால் இவர்கள் காரை மோதிவிட்டுத் தப்பி ஓடியதாகவும்,  திருவெற்றியூர் சவேரியார் நகரில் காரை நிறுத்திவிட்டுத் தப்பி ஓட முயற்சித்த கோவிந்தன்  முதல்நிலைக் காவலர் சவுந்தரபாண்டியனையும் தன்னையும் அரிவாளால் வெட்டியதாகவும், தங்கள் உயிரைக் காப்பாற்றிக் கொள்ள கோவிந்தனைத் தான் காலில் சுட்டு, இராமநாதபுரம் மருத்துவமனையில் கொண்டு சேர்த்துவிட்டுத் தானும் மருத்துவமனையில் அட்மிட் ஆகியதாகவும், மருத்துவமனையில் சேர்க்கப்பட்ட கோவிந்தன் இறந்ததைத் தான் பின்னரே அறிந்ததாகவும்  தங்கமுனியசாமி கூறுகிறார். ஊடகங்களில் இதுவே செய்தியாகவும் வெளி வந்துள்ளது.

     கேணிக்கரைக் காவல்நிலையத்திற்குத் தற்போது பொறுப்பில் உள்ள ஆய்வாளர் டி.ஏ.வெங்கடேசனைத் தொடர்பு கொண்டபோது, அவர் தான் இந்தப் பகுதிக்குப் புதியவர் எனவும் இங்குள்ள காவலர்களின் பின்னணி தனக்குத் தெரியாது எனவும் காசிநாதன் வழிப்பறி குறித்துப் புகார் அளித்தபோது தான் அந்தக் காவல் நிலையத்திற்குப் பொறுப்பாக இல்லை எனவும் குறிப்பிட்டார்.

காவல்துறையினர் எங்களிடம் கூறியவை:

        காவல்துறைக் கண்காணிப்பாளர் என். மணிகண்டன் அவர்கள் எம் குழுவிடம் விரிவாகப் பேசினார். எங்கள் ஐயங்களை முன்வைத்தபோது தற்போது வழக்கு சி.பி.சி.ஐ.டி க்கு மாற்றப்பட்டுள்ளதால் இப்போது தான் இந்த வழக்கைப் பொருத்த மட்டில் ஒரு “மூன்றாம் நபர்” (third party) எனவும், தான் இது தொடர்பாக எதுவும் சொல்ல முடியாது எனவும் கூறினார். இப்படியான ‘மோதல்’ கொலைகளில் சுட்டுக் கொன்ற காவலர்கள் மீது கொலை வழக்கு பதிவு செய்து விசாரிக்க வேண்டும் எனவும் தான் உயிர் பிழைப்பதற்காக வேறு வழியின்றி தற்காப்பிற்காகவே சுட்டுக் கொன்றதாகவும் நிறுவும் வரை என்கவுன்டர் செய்த காவலர்கள் குற்றவாளிகளாகவே கருதப்பட வேண்டும் எனவும் மனித உரிமை ஆணையம், உச்சநீதி மன்றம் முதலியன கூறியுள்ளதையும் அவருக்குக் கவனப்படுத்திய போது அப்படி இருந்தால் அதை இப்போது பொறுப்பேற்றுள்ள சி.பி.சி.ஐ.டி தான் செய்ய வேண்டும் என்றார். முதல் தகவல் அறிக்கை பதிவு செய்தவுடனேயே இதைச் செய்திருக்க வேண்டாமா எனக் கேட்டபோது தான் இது தொடர்பான விதிகளைப் பரிசீலிப்பதாகச் சொன்னார். சட்டவிரோதக் கடத்தல் தொழில் செய்யப்படுவதாகச் கூறப்படும் ஒரு நபர் சம்பவம் நடந்ததாகச் சொல்லப்படுவதற்கு இரண்டு நாட்கள் கழித்து ஒரு புகாரைச் செய்துள்ள நிலையில் உடனடியாக மற்ற காவல் நிலையம் ஒன்றிலிருந்து காவல்துறையினரை வைத்து ஒரு சிறப்புப்படை அமைக்க வேண்டிய அவசரம் ஏன் எனக் கேட்டபோது, கடத்தல்காரர் என்பதற்காகவே அவர் கொடுத்த புகாரை விசாரிக்காமல் இருக்க முடியாது எனவும், இப்படியான சிறப்புப் படை அமைப்பது வழக்கம்தான் எனவும் அவர் கூறினார். இது ஒரு சாதி வெறுப்புகள் கூர்மைப்பட்டுள்ள ஒரு பகுதி என்கிறபோது இப்பகுதியில் உள்ள காவல் நிலையங்களில் உளவுத்துறையினர் மற்றும் காவல்துறையினர் பலர் ஆதிக்க சாதிகளைச் சேர்ந்தவர்களாகவே உள்ளனர் என்கிற குற்றச்சாட்டு பற்ரிக் கேட்டபோது இதில் எல்லாம் சாதியைப் பார்த்துக் கொண்டிருக்க முடியாது என்றார். இது ஒரு சாதியச் சமூகம் என்பதை அரசே எற்றுக் கொண்டுள்ளபோது இப்படி நீங்கள் சொல்வது சரிதானா எனக் கேட்டபோது இது தொடர்பாகக் கவனத்தில் எடுத்துக் கொண்டு இனி எல்லாப் பிரிவினருக்கும் வாய்ப்பளிப்பதாகக் கூறினார்.

     இராமநாதபுரம் மருத்துவமனையில் ‘சி’ வார்டில் ‘சிகிச்சை’ பெற்றுவரும் தங்கமுனியசாமியையும் சௌந்தரபாண்டியனையும் பார்த்தோம். தங்கமுனியசாமி எதையும் சொல்லமுடியாது என மறுத்துவிட்டார். நீங்கள் காலில்தான் சுட்டீர்கள், பின் எப்படி அவர் இறந்தார் என்பதற்கும் அவர் பதிலளிக்கவில்லை. அவரைப் பார்த்துவிட்டு வரும் வழியில் அங்கு பொறுப்பில் இருந்த செவிலியர் ஒருவரை விசாரித்தபோது அவர் சிரித்துக் கொண்டே தற்போது  மருத்துவமனையில் தங்கி சிகிச்சை பெறும் அளவிற்கு அவர்களுக்கு ஒன்றும் இல்லை என ஒத்துக்கொண்டார்.

எமது பார்வைகள்:

  1. சாதிமுரண்கள் மிகவும் கூர்மைப்பட்டுள்ள இப்பகுதியில் இது குறித்த சிந்தனை சற்றும் இன்றிக் காவல்துறை செயல்பட்டுள்ளது. அதன் செய்ல்பாடுகள் இப்பகுதியில் உள்ள ஆதிக்க சாதியினருக்கே சாதகமாக உள்ளன. திருவாடனைச் சரகத்தில் உள்ள ஐந்து காவல்நிலையங்களிலும் உளவுத்துறையினராக (SB CID) ஆதிக்க சாதியினரே இருப்பதாகவும் குறிப்பாக திருவாடனையில் உள்ள ராஜா என்பவர் மிகவும் சாதி உணர்வுடன் செயல்படுவதாகவும் நாங்கள் சந்தித்த பட்டியல் சாதியினர் குற்றம் சாட்டினர். அதுவும் இதே பகுதியைச் சேர்ந்த ஆதிக்கசாதியினராக உள்ளதால் சாதி வெறுப்பு காவல் நிலையங்களில்கூடுதலாக உள்ளது என்பதையும் அவர்கள் கூறினர். என்கவுன்டர் செய்வதற்கு அனுப்பப்பட்டவர்களில் தங்கமுனியசாமியும் கமுதியைச் சேர்ந்த ஆதிக்கசாதியினரே. அவர்தான் என்கவுன்டர் செய்தவரும் கூட. அந்த டீமில் இருந்த சௌந்தரபாண்டியன் என்பவர் பட்டியல் இனத்தவர் எனச் சொல்லப்படுகிறது. இது வழக்கமாகக் காவல்துறை செய்வதுதான். அப்படியான ஒருவரையும் அவர்கள் டீமில் இணைப்பது இப்படியான குற்றச்சாட்டுகளை எதிர்கொள்வதற்காகத்தான்.
  2.  பரமக்குடி வழக்குரைஞர் பசுமலை அவர்களைச் சந்தித்தபோது அவர் உரிய ஆதாரங்களுடன் ஒரு முக்கிய தவலைக் கூறினார். சில ஆண்டுகள் முன் பரமக்குடியில் இமானுவேல் சேகரன் நினைவுநாளில் (2011) ஆறு பட்டியல்சாதியினரைச் சுட்டுக் கொன்றதை விசாரிக்க அமைக்கப்பட்ட நீதியரசர் சம்பத் கமிஷன் முன் சுட்டுக் கொல்லப்பட்டவர்களில் ஒருவரான முத்துக்குமார் என்பவரின் மனைவி பான்டீஸ்வரி ஒரு புகாரைக் கொடுத்துள்ளார். அந்தப் புகாரில் அவர் தன் கணவரைச் சுட்டுக் கொன்றது இந்த தங்கமுனியசாமி எனக் குறிப்பிட்டுள்ளார். அப்படியான ஒருவரை பட்டியல் இனத்தைச் சேர்ந்த அமைப்பொன்றில் இருந்து செயல்படுபவரும், பஞ்சாயத்துக்கள் செய்பவருமான கோவிந்தனைப் பிடிக்க அனுப்பியது என்பதைக் காவல்துறை எப்படி விளக்கப் போகிறது எனத் தெரியவில்லை.
  3. 2011 பரமக்குடி துப்பாக்கிச் சூடு, தற்போது நடந்துள்ல இந்த என்கவுன்டர் எல்லாவற்ரையும் பார்க்கும்போது காவல்துறை பட்டியல்சாதியினரைத் தொடர்ந்து காழ்ப்புடன் அணுகிவருவது உறுதியாகிறது.
  4. கோவிந்தன் மீது சாதிப் பஞ்சாயத்துகள் செய்பவர், சில வழக்குகளில் குற்றஞ்சாட்டப்பட்டவர் என்கிற புகார்கள் இருந்தபோதும் அவர் மீது வழிப்பறி செய்ததாக இதுவரை எந்தக் குற்றச்சாட்டும் இல்லை.
  5. இந்த என்கவுன்டருக்குத் துணை செய்த துல்கர்னை, சின்ராஜ் முதலானோருக்கு வழக்குரைஞர் முதலானோரை வைத்து எல்லா உதவிகளையும் செய்து காவல்துறை அவர்களைத் தம் கட்டுப்பாட்டில் வைத்திருப்பது பல ஐயங்களுக்குக் காரணமாகிறது.
  6. பணம் பறிகொடுத்ததாகச் சொல்லப்படும் காசினாதன் என்பவர் ஒரு கடத்தல்காரர். 11ம் தேதி பணத்தைப் பரிகொடுத்ததாகச் சொல்லும் இவர் ஏன் 13ம் தேதிவரை புகார் கொடுக்காமல் இருந்தார் என்பதும், புகார் கொடுத்தவுடன் உடனடியாக ஒரு சிறப்புப்படையை நியமித்து அதில் இன்னொரு காவல்நிலையத்தைச் சேர்ந்த தங்க முனியசாமியைக் குறிப்பாகச் சேர்த்ததும் தற்செயலானவை அல்ல.
  7. எந்தப் பெரிய காயங்களும் இல்லாத தங்கமுனியசாமியை மருத்துவமனையில் வைத்திருப்பதில் எந்த நியாயமும் இல்லை. காவல்துறையின் பிடிவாதத்தாலேயே அவர் அங்கு வைக்கப்பட்டுள்ளார். இதை அங்குள்ள செவிலியரும் குறிப்பாகச் சுட்டிக் காட்டுகின்றனர். காவல்துறை இந்தப் போலி என்கவுன்டருக்கு ஒரு ‘அலிபி’யை உருவாக்குவதற்காகவே இதைச் செய்கிறது. இதற்கு எந்த அறமும் இன்றி மருத்துவ நிர்வாகம் ஒத்துழைப்பது இழிவானது.
  8. என்கவுன்டர் செய்து கொன்ற தங்கமுனியசாமி முதல் தகவல் அறிக்கையில் தான் கோவிந்தனைக் கால்களிலேயே சுட்டதாகக் கூறுகிறார். காலில் சுடப்பட்டு உயிருடன் மருத்துவமனையில் சேர்க்கப்பட்ட 42 வயதுள்ள ஆரோக்கியமான யாரும் அடுத்த சிலமணி நேரங்களில் இறப்பது என்பது சாத்தியமே இல்லை. கொவிந்தனின் உடலின் வீடியோ ஒன்றை எங்கள் குழு பரிசீலித்தபோது அவருக்கு விலா மற்றும் உடலின் மேற்பகுதிகளில் காயங்கள் இருப்பது தெரிகிறது. இந்நிலையில் உற்றார் உறவினர்கள் யாரும் இன்றி காவல்துறையினர் தன்னிச்சையாக பிரேத பரிசோதனை செய்துள்ளது கண்டிக்கத் தக்கது. இதைக் காவல்துறையும் மருத்துவத் துறையும் விளக்க வேண்டும்.

கோரிக்கைகள்:
  1. இது ஒரு போலி என்கவுன்டர் என்று எம் குழு உறுதியாகக் கருதுகிறது. இதைக் கொலைக் குற்றமாகக் கருதி தங்கமுனியசாமி உள்ளிட்ட என்கவுன்டர் கொலைக்குக் காரணமானவர்கள் சஸ்பென்ட் செய்யப்படுவதோடு அவர்கள் மீது கொலை வழக்குப் பதிவு செய்து வன்கொடுமைத் தடுப்புச் சட்டத்தின் கீழ் (SC/ST Act) அவர்கள் உடனடியாகக் கைது செய்யப்பட வேண்டும்.
  2. கோவிந்தனின் குடும்பத்தார் மற்றும் அவர்களின் முன்னிலையில் மீண்டும் அவரது உடல் பிரேத பரிசோதனை செய்யப்பட வேண்டும்.
  3. சி.பி.சி.ஐ.டி விசாரணைக்கு உடனடியாக அதிகாரிகளை நியமிப்பதோடு விச்சாரனையை முடிக்க காலகெடுவும் அறிவிக்கப்பட வேண்டும்.
  4. சாதிபார்த்தெல்லாம் காவல்துறையினரை நியமிக்கக் முடியாது எனக் கண்காணிப்பளர் சொல்வதை ஏற்க முடியாது. இது ஒரு சாதியச் சமூகம் என்பதை அரசே ஏற்றுக்கொண்டதன் விளைவாகத்தான் இங்கே வன்கொடுமத் தடுப்புச் சட்டம் முதலான சிறப்புச் சட்டங்கள் இயற்ற்றப்பட்டுள்ளன. சமூகத்தின் பன்மைத் தனமை ஒவ்வொரு அரசு மற்றும் தனியார் துறைகளிலும் பிரதிபலிக்க வேண்டும் என்பதை சச்சார் கமிஷன் அறிக்கை உட்படப் பல ஆய்வுகளும் அறிக்கைகளும் சுட்டிக் காட்டியுள்ளன. சாதி முரண் கூர்மைப்பட்டுள்ள இப்பகுதியில் பதவியில் உள்ள காவல்துறையினர், உளவுத்துறையினர் முதலானோரின் சமூகப் பின்னணி குறித்துக் காவல்துறை உரிய முறையில் விசாரித்து அறிக்கை அளிக்க வேண்டும். அதேபோல கோவிந்தனைப் பிடிக்க தங்கமுனியசாமி முதலானோர் தேர்வு செய்யப்பட்டதன் பின்னணியும் விசாரிக்கப்பட வேண்டும். பாதிக்கப்பட்டவர்களால் குற்றம் சாட்டப்படும் சாதி உணர்வுள்ள உளவுத்துறையினர் மற்றும் அதிகாரிகள் உடனடியாக இடமாற்றம் செய்யப்பட வேண்டும்.
  5. இந்தப் போலி மோதலில் கொல்லப்பட்ட கோவிந்தராசுவின் குடும்பத்துக்கு உடனடியாகப் பத்து இலட்சரூபாய் இழப்பீடு வழங்க வேண்டும். அவரது மகள்களில் ஒருவருக்கு தகுதியுள்ள அரசு வேலை ஒன்று அளிக்கப்பட வேண்டும்.
  6. பாதிக்கப்பட்ட அக்குடும்பத்தினர் தொடர்ந்து கண்காணிக்கப்படுவதையும், மிரட்டப்படுவதையும், அடிக்கடி காவல்துறை வாகனங்களை அனுப்பி அந்தக் குடும்பத்தின் மீதே மற்றவர்களுக்கு அச்சம் ஏற்படுமாறு செய்வதையும் இக்குழு வன்மையாகக் கண்டிக்கிறது. இவற்றை உடனடியாகக் காவல்துறையினர் நிறுத்திக் கொள்ள வேண்டும்.
  7. இதுபற்றியான செய்தி வெளியீட்டில் ஊடகங்கள் சில காவல்துறையின் பொய்களை எந்த ஆய்வுகளும் இன்றி அப்படியே வெளியிடுவதை வேதனையோடு சுட்டிக் காட்டுகிறோம். பாதிக்கப்பட்டவர்களிடமும் கருத்தைக் கேட்டே ஒருவர் பற்றிய குற்றச்சாட்டை வெளியிட வேண்டும் என்பதே ஊடக தர்மம். இந்தியாவில் நடைபெறும் என்கவுன்டர் கொலைகளில் 90 சதம் போலியானவை என்பது ஊடகத்தினர் அறியாத ஒன்றல்ல.
  நன்றி: பேரா. அ.மார்க்ஸ்

செவ்வாய், ஏப்ரல் 18, 2017

சுவரொட்டிக் கனவான்களே! மூடப்பட்ட டாஸ்மாக் கடைகளை வேறிடத்தில் திறப்பதற்கும் நன்றி சொல்லுங்கள்!!



சுவரொட்டிக் கனவான்களே! மூடப்பட்ட டாஸ்மாக் கடைகளை வேறிடத்தில் திறப்பதற்கும் நன்றி சொல்லுங்கள்!!.

மு.சிவகுருநாதன்

     சில நாள்களுக்கு ((ஏப்ரல் 08, 2017) முன்பு டாஸ்மாக் நன்றி சுவரொட்டிகள் பற்றிய பதிவிட்டிருந்தேன். இது தொற்று வியாதியாகத்  தொடர்கிறது. மூடப்பட்ட டாஸ்மாக் கடைகள் அனைத்தையும் நெடுஞ்சாலைகள் தவிர்த்து குக்கிராம மூலை முடுக்குகளில் திறந்திட அயராது உழைத்துக் கொண்டிருக்கும் மாவட்ட ஆட்சியர், டாஸ்மாக் மேலாளர் ஆகியோருக்கு நன்றி சொல்ல அபார துணிச்சல் வேண்டும்; மாறாக மனச்சாட்சிதான் தேவையில்லை.



    நகரங்களில் உள்ள கடைகளை மூடிவிட்டார்களாம்! ஏதோ இவர்களாக மக்கள் நலன் கருதி மூடியதாகச் சொல்வது எவ்வளவு கொடூரம்? நகரத்துக் குப்பைகளை வெளியே கொட்டுவது போல் டாஸ்மாக் கடைகளைப் புறநகரில் திறக்கும் கொடுமைக்கு நன்றி ஒரு கேடா?
   திருவாரூர் விஜயபுரம் வர்த்தகர் சங்கம், தமிழக மக்கள் முன்னேற்றக் கழகம் ஆகியவற்றின் பெயரால் இப்போது நகரமெங்கும் சுவரொட்டிகள் முளைத்துள்ளன. மாவட்டந்தோறும், ஏன் தமிழகமெங்கும் போர்க்கால வேகத்தில் டாஸ்மாக் கடைகள் திறக்க முயலும் நிர்வாகத்திற்கு நன்றி சொல்வதைவிட வேறு இழிவு இருக்க முடியுமா?



    இவர்கள் நன்றி சொல்வதை விட்டுவிட்டு அருகே நடக்கும் மக்கள் போராட்டங்களுக்கு ஏதேனும் செய்ய முயற்சித்தது உண்டா? திருவாரூர் கும்பகோணம் நெடுஞ்சாலையில் காட்டூர் விளாகம் கடையை அகரத்திருநல்லூரில் திறக்க பெருமுயற்சி செய்யப்படுகிறதே! இதில் இந்த நன்றிக்குரியவர்களின் பங்கு என்ன? அடிப்படை வாழ்வாதாரமான தினக்கூலி வேலைகளுக்குக் கூட செல்லாமல் மக்கள் வாரக்கணக்கில் போராடுகிறார்களே! அவருக்கு நன்றி சொல்ல, ஆதரவளிக்க, இந்த கனவான்கள் ஏதேனும் செய்ததுண்டா?

    அருகே நாகப்பட்டினம் மாவட்டம் வேதாரண்யம் வட்டம் அண்ணாப்பேட்டையில் வேதாரண்யம் பட்டுக்கோட்டை சாலையில் உள்ள மதுக்கடையை அகற்ற பெண்களும் இடதுசாரி இயக்கங்களும் நீண்ட நாட்களாகப் போராட்டம் நடக்கிறது. அது மாநில நெடுஞ்சாலை இல்லையாம்! எனவே கடை இன்னும் அகற்றப்படவில்லை. இவர்களுக்கும் நன்றி சொல்லுங்கள் கனவான்களே!

செவ்வாய், ஏப்ரல் 11, 2017

அரசியல், மத ஆதிக்கங்களை ஒழுக்கங்கெட்டவர்களும், குற்றவாளிகளும் நடத்துகிறார்களா?



அரசியல், மத ஆதிக்கங்களை ஒழுக்கங்கெட்டவர்களும், குற்றவாளிகளும் நடத்துகிறார்களா?


(மூத்த வழக்கறிஞர் திரு பொ.இரத்தினம் அவர்கள் வெளியிட்ட துண்டறிக்கை.)



    “நானும் தமிழந்தான், தமிழ்நாட்டு அரசை  பெங்களூரு சிறைத்தண்டனைக் கைதி இயக்குகிற கொடுமை நடக்கிறது. தமிழர்கள் ஏன் வேடிக்கை பார்க்கிறார்கள்? நான் நாடு திரும்பியதும் தமிழ்நாட்டில் உண்ணாவிரதம் இருந்து செயல்பட உள்ளேன்”, 

இந்தியத் தலைமை நீதிமன்ற ஓய்வு பெற்ற நீதிபதி திரு மார்கண்டேய கட்சு.

     இப்படி நல்லவர்கள் பலர் தமிழ்நாட்டின் அரசியல் போக்கு கண்டு வேதனைப் படுகிறார்கள். அரசியல் நடவடிக்கைகள் இந்திய அரசமைப்புச் சட்டத்தைப் பயனற்ற செல்லாக் காசாக்கி விட்டன. அனைத்து அதிகார மையங்களிலும் ஊழல் தலைவிரித்தாடுகிறது. குற்ற மனப்பான்மையுள்ளவர்கள், குற்றச் செயலில் அம்பலமானவர்கள், கட்சி அரசியலில் காட்டுமிராண்டித்தனமான செயல்பாடுகளில் ஈடுபடுவது நாளுக்கு நாள் கூடிவருகிறது. எனவேதான் மக்களாட்சியில், அரசியல் சட்ட நோக்கங்களில் அக்கறை உள்ளவர்கள் ஒருங்கிணைந்து மக்கள் சக்தி வலுவாவதற்கான முறையான முயற்சிகளைக் கடைபிடிக்க முன்வருகின்றனர். இதனை ஒருங்கிணைத்து முன்னோக்கிப் பயணிக்கவே ‘சமத்துவ மக்கள் படை’ என்ற அமைப்பை உருவாக்கியுள்ளோம்.


     “மகாபாரதம் பெண்களை இழிவுபடுத்தும் நூல்”, என நடிகர் கமல் விமர்சனம் செய்துள்ளார். “அவர் பகிரங்கமாக மன்னிப்பு கேட்கவேண்டும்” என்று கிளம்பியுள்ளார் கர்நாடக பரமேஸ்வர மடத்தின் மடாதிபதி பிரணவானந்தா.

    இந்தியாவில் தொடர்ந்து இந்து சாமியார்கள் மற்றும் இந்துத்துவ வெறியர்கள் அருவெறுப்பான, மத நம்பிக்கைகள் என்ற காட்டுமிராண்டித்தனமான மூடத்தனங்களை பரவலாக்கி வருகின்றனர். சபரிமலைக்கு 10 வயது  முதல் 50 வயதுள்ள பெண்கள் வரக்கூடாது என தாய்மையைப் பழிக்கும் அநாகரிக முரடர்கள் ஆதிக்கம் செய்வது தொடர்கிறது. அங்கு காட்டப்படும் தீபம் செயற்கையானது. கேஸ் சிலிண்டர் மூலம் தீயை மூட்டி எரியவிட்டு ஆன்மீக தீபம் என்ற பித்தலாட்டத்தை மாநில அரசு தயங்கித் தயங்கி உறுதி செய்துள்ளது. ஆனாலும் பித்தலாட்டக் கும்பல் தனது காட்டிமிராண்டிச் செயலை விடாமல் மூடநம்பிக்கைகளை வலுவாக்கத் துடிக்கிறார்கள்.

     தீண்டாமை, படிநிலைச் சாதியத்தின் பாசிசக் கொடுமைதானே. இதனை ஒழிக்க வேண்டும் என்பது போல் பாசாங்கு செய்து மாமனிதர் அம்பேத்கரின் நினைவகம் போன்றவற்றிற்கு ஏராளமான பணத்தை ஒதுக்கி மோடி அரசு ஆரிய சூழச்சிக்கு வலு சேர்ப்பதும் நடக்கிறது. இத்தகையச் செயல்பாடுகளால்தான் 1937 –ல் அம்பேத்கர் தான் சாகும்போது இந்துவாகச் சாகமாட்டேன் எனச் சபதமெடுத்தார். 1956 ஆம் ஆண்டு அக்டோபர் 14 ஆம் நாள் நாக்பூரில் லட்சக்கணக்கான மக்களுடன் புத்தம் தழுவினார். 

  அம்பேத்கர் நாக்பூரில் ‘சமத்துவ சமூகப் படை’ என்ற  விடுதலை உணர்வை வலுப்படுத்தும் அமைப்பை ஏற்படுத்தினார். புத்தம் தழுவிய நிகழ்ச்சியின்போது இந்தப் படை இளைஞர்களைக் கொண்டு மேடையைச் சுற்றி அரண் அமைத்து அம்பேத்கருக்கு பாதுகாப்பு நடவடிக்கைகளை மேற்கொண்டனர். காந்தியாரைக் கொன்ற காட்டுமிராண்டிக் கும்பல் அம்பேத்கரை இந்துத்துவத்தின் முதல் எதிரியாகத்தானே கணித்திருந்தது. ஆனாலும் மிகக் கவனமாக எதிரி முகாம்களின் திட்டங்களை உளவு கண்டு  பாதுகாப்பு முறைகளைக் கடைபிடித்தனர் அம்பேத்கர் பற்றாளர்கள்.

   சேது சமுத்திரத் திட்டத்தை அறிவித்தவுடன் ராமர் பாலம் எனச்சொல்லி கதையளந்த கும்பல், அது மதம் சார்ந்த நம்பிக்கை, அங்கே அறிவியல் ரீதியான கேள்விகளுக்கு இடமில்லை என்ற முழுப் பித்தலாட்டத்தைப் பரப்பினர். தலைமை நீதிமன்றத்தின் அறிவுரைப்படி மத்திய நிபுணர் குழுவை அமைத்து ராமர் பாலம் பற்றி ஆய்வு செய்து அறிக்கை கொடுக்க ஏற்பாடானது. அக்குழுவும் ஆய்வு செய்து அறிக்கை கொடுத்தது. அங்கு  அமைந்துள்ளது பாலம் அல்ல, இயற்கையாக ஏற்பட்ட மணல்திட்டு என்று அறிவியல் ரீதியான அறிவித்தது அக்குழு. அக்குழுவைச் சார்ந்த நிபுணர்கள் மீது வேறு பொய்க் காரணங்களை உருவாக்கி தற்காலிக பதிவி நீக்கம் செய்தது அரசு. இப்படி அரசியல் சட்ட உறுதிமொழிகளை முழுமையாக வேரறுக்கும் கொடூரக் கும்பலாகத்தான் இந்துத்துவ வெறியர்கள் ஆட்சியிலும் செயல்படுகிறார்கள். 

    ‘சமத்துவ மக்கள் படை’ அரசியல் கட்சிபோல்  செயல்படாது. அரசியல் சட்ட நோக்கங்களை அடிப்படையாகக் கொண்ட மக்கள் இயக்கமாக செயல்படும். தேர்தல் போன்ற நடவடிக்கைகளில் ஈடுபடாது. இந்த அமைப்பிற்கான கொடி சிவப்புநிறத்தைக் கொண்ட நடுவில் நீல நிறத்தில் முக்கோணத்துடன் அமையும். மாமனிதர் அம்பேத்கர் அடையாளப்படுத்தியுள்ள புத்த அணுகுமுறையான சுதந்திரம், சமத்துவம் மற்றும் சகோதரத்துவம் அடித்தளமாகிறது.


அக்கறையாளர்களைத் தளர்வின்றி ஒருங்கிணைப்போம்!

மூட நம்பிக்கைகளின் தளங்களை நொறுக்குவோம்!!

ஆதிக்கமில்லா சமத்துவ சமூகத்தைக் கட்டமைப்போம்!!!

தொடர்பு முகவரி:

அமைப்புக்குழு,

சமத்துவ மக்கள் படை,

87, சுபாஷ் சந்திரபோஸ் நகர்,

எருமாபாளையம் – அஞ்சல்,

சேலம் – 636015.

அலைபேசி:

94434 58118 / 98427 71751 / 94862 65265


நன்றி: வழக்கறிஞர் திரு பொ.இரத்தினம்

சனி, ஏப்ரல் 08, 2017

யாருக்கு நன்றி சொல்வது?



யாருக்கு நன்றி சொல்வது? 

  மு.சிவகுருநாதன்




    திருவாரூர் மாவட்ட ஆட்சியரகம் அமைந்துள்ள தண்டலை ஊராட்சிக்குட்பட்ட பகுதிகளில் “டாஸ்மாக் இல்லாத தண்டலை ஊராட்சியாக மாற்றிக்கொடுத்த திருவாரூர் மாவட்ட ஆட்சியர் அவர்களுக்கும் டாஸ்மாக் மேலாளர் அவர்களுக்கும் நன்றி… நன்றி… நன்றி…”, என சுவரொட்டிகள் ஒட்டப்படுள்ளன. தண்டலை ஊராட்சி கிராமவாசிகள் மற்றும் அனைத்து மகளிர் குழு, சேவை சங்கங்கள் என்கிற போர்வையில் இவர்கள் தங்களுக்கு தாங்களே இவ்வாறு போஸ்டர் அடித்து ஒட்டியுள்ளனர்! 

   இது மிகவும் அபத்தமானது மட்டுமல்ல; இழிவாகவும் உள்ளது. டாஸ்மாக் மதுக்கடைகள் மூடப்பட்டதில் மாவட்ட ஆட்சியர், டாஸ்மாக் மேலாளர் ஆகியோரின் பங்கு என்ன? இவர்கள் நன்றிக்கு உரியவர்களா? இவ்வாறு சுவரொட்டி ஒட்டியவர்கள் மீதும் செய்யத் தூண்டியவர்கள் மீதும் நடவடிக்கை எடுக்கவேண்டும். மேலும் இவர்கள் இருவரும் இது குறித்து விளக்கமளிக்கவேன்டும். 

    உண்மையில் நன்றிக்குரியவர்கள் யார்? மதுக்கடைகள் மூட தொடர்ந்து போராடும் இடதுசாரிகள், தலித் அமைப்புகள், பா.ம.க. போன்ற கட்சிகள், பொதுமக்கள், மதுவிலக்குப் பரப்புரையை தீவிர இயக்கமாக முன்னெடுத்த மக்கள் அதிகாரம் (ம.க.இ.க) போன்ற அமைப்பினர், ராஜூ, பாலு போன்ற பல வழக்கறிஞர்கள், போராடி மரணமடைந்த சசிபெருமாள், குமரி அனந்தன், நந்தினி போன்றோர் இதனால் பல்வேறு வழக்குகளை எதிர்கொண்ட பாடகர் கோவன், பள்ளிக் குழந்தைகள் என பலருக்கு நன்றி சொல்ல இந்த சமூகம் கடமைப்பட்டுள்ளது. 

   மேலும் இதற்காக நீதிப்போராட்டம் நடத்திய ஹர்மான் சித்து (சண்டிகர்), ஆந்திரப் பிரதேச சாலைப் பாதுகாப்பு மன்றத் தலைவராக இருந்த பி.புல்லாராவ், தீர்ப்பளித்த உச்சநீதிமன்ற  நீதிபதிகள் கேஹர், சந்திரசூட், நாகேஸ்வரராவ், வழக்காடிய வழக்கறிஞர்கள் (நெடுஞ்சாலை கடைகளுக்கு ஆதரவாக பெரும் பணமுதலை வழக்கறிஞர்கள் வாதாடினர்.) ஆகிய பலருக்கு நன்றி சொல்லவேண்டும். (இந்தப்பட்டியல் முழுமையானதல்ல; இதில் பங்கேற்றவர்கள் எண்ணற்றோர்.) 

  உச்சநீதிமன்றத்தின் தீர்ப்பை ஒட்டி தமிழ்நாட்டில் உள்ள 5,672 டாஸ்மாக் மதுக்கடைகளில் 3,316 கடைகள் மூடப்பட்டுள்ளன. இந்த சாதனைகளுக்கு யாருக்கு நன்றி சொல்வது? இந்த கடைகளை வேறு எங்காவது திறந்திட தீவிர முனைப்பு காட்டும் மாவட்ட ஆட்சியர், டாஸ்மாக் மேலாளர் போன்ற அதிகார வர்க்கத்திற்கு நன்றி சொல்வதைவிட இழிவு வேறு இருக்க முடியுமா? இத்தகைய திசை திருப்பு உத்திகள் முறியடிக்கப்படவேண்டும். 

   நீதிமன்ற உத்தரவை வேறு வழியின்றி செயல்படுத்திய அரசு அலுவலர்களுக்கு இந்த நன்றிகள் எப்படி பொருந்தும்? இவர்கள் ஊதியம் வாங்காமல் சேவை செய்கிறார்களா? மாநில நெடுஞ்சாலைகளை மாவட்டச் சாலைகளாக மாற்றி மீண்டும் அங்கு மதுக்கடைகளைத் திறக்கத் துடிக்கும் அதிகார வர்க்கத்திற்கு நன்றி சொல்வதும் அவர்களே சுவரொட்டி அச்சிட்டு விளம்பரம் செய்வது கடும் கண்டனத்திகுரியது. 

      தண்டலை ஊராட்சி டாஸ்மாக் கடைகள் பலவகைகளில் சரித்திர முக்கியத்துவம் வாய்ந்தவை என்றால் நீங்கள் வியப்படையக்கூடும். மூடப்பட்ட கடைகளில் இரண்டு நாகப்பட்டினம் – மைசூரு தேசிய நெடுஞ்சாலை 67 –ல் இருந்தவை.  இவையிரண்டும் முந்தைய உச்சநீதிமன்ற உத்தரவிற்குப் பின்பு முன்புற ஷட்டரை முடிவிட்டு பின்புறம் சுவரை இடித்து வாயில் அமைத்து மதுக்கடையாக இயங்கி வந்தவை. தமிழகம் முழுதும் இதுதான் நிலை என்கிறீர்களா? இன்னொன்றும் இருக்கிறது.

   இந்த இரண்டில் ஒரு மதுக்கடைதான் இதே தண்டலை ஊராட்சிக்குட்பட்ட விளமல் அரசு உயர்நிலைப்பள்ளி ஒன்பதாம் வகுப்பு மாணவன் கவுசிகனுக்கு பியர் போத்தல் விற்பனை செய்தது. பள்ளி மதிய உணவு இடைவேளையில் (27.02.2012) அம்மாணவன் பள்ளிச்சீருடையில்தான் பியர் பாட்டில் வாங்கிக்கொண்டு சைக்கிளில் செல்லும்போது வெடித்துச் சிதறி உயிரிழந்தான். அப்போதைய மாவட்ட ஆட்சியர் இந்த கடைமீதும் ஊழியர்கள் மீதும் எவ்வித நடவடிக்கையும் எடுக்கவில்லை. விற்பனை இலக்கு குறைந்தால்தானே நடவடிக்கை? இதற்கெல்லாம் நடவடிக்கை எடுக்க முடியுமா? என்று கேட்கலாம். குழந்தைகளுக்கு மது, புகையிலைப் பொருள்களை விற்பனை செய்ய சட்டத்தில் இடமிருக்கிறதா என்ன? 

   தங்களின் பார்வைக்காக இது குறித்து எழுதப்பட்ட இரண்டு கட்டுரைகளின் இணைப்பைக் கீழே தருகிறேன்.

ஒன்பதாம் வகுப்பு மாணவனுக்கு பியர் புட்டிகள் விற்கும் அரசு டாஸ்மாக் கடைகள்

http://musivagurunathan.blogspot.in/2012/02/blog-post_29.html

டாஸ்மாக் தமிழகம் 

http://musivagurunathan.blogspot.in/2012/12/blog-post_31.html