திருவாரூர் மாவட்டத்தில் முடக்கப்பட்ட இந்த வார ஆனந்த விகடன் இதழ்

திருவாரூர் மாவட்டத்தில் முடக்கப்பட்ட இந்த வார ஆனந்த விகடன் இதழ்    

                                                       - மு.சிவகுருநாதன்

ஆனந்த விகடன் 15.07.2015 இதழ்

    பல ஆண்டுகளாக ஆனந்த விகடன் இதழைத் தொடர்ந்து வாசித்து வருகிறேன். வேறு எதைப் படிக்க மறந்தாலும் லூசுப்பையனை மறப்பதில்லை. சமீப காலமாக இதழ் பெருத்த மாற்றம் பெற்று பலதரப்பட்ட கருத்துக்களுக்கு ஓரளவிற்கு இடமளித்து வருகிறது. திருவாரூரில் ஒவ்வொரு வாரமும் வியாழன் அன்று கடைக்கு வரும் ஆவி வாரம் முழுக்க விற்பனையில் இருக்கும். நேரம் கிடைக்கும்போது வாங்கிப் பார்ப்பேன். 

    இந்த வாரம் வியாழன் மறந்துவிட்டேன். வெள்ளிக்கிழமை கடைகளில் இல்லை. சில கடைகளில் முடிந்து விட்டது என்றார்கள். சிலர் மொத்தமாக வாங்கிச் சென்றுவிட்டார்கள் என்றார்கள். யாரும் காரணம் சொல்லவில்லை. நண்பர் ஒருவர் காமராஜ் பற்றி எழுதிருப்பதாகவும் அதனால் வாங்கிவிட்டார்கள் என்றும் சொன்னார்.

     நான் பெருந்தலைவர் கு.காமராஜ் என்று நினைத்து விட்டேன். வரும் ஜூலை 15 பிறந்த நாள் வருகிறதல்லவா? பாரதிதம்பி கல்வி வளர்ச்சி நாள் பற்றிய அட்டைப்படக் கட்டுரை எழுதியிருக்கிறார் போலும் என்று எண்ணினேன். 

    தற்போது இணையத்தில் ஆவி முகப்புப் படத்தைப் பார்த்தபோதுதான் தெரிந்தது மந்திரி தந்திரி பகுதியில் ஆர்.காமராஜ் பற்றிய செய்தி வந்துள்ளது. இதனால் ஆவி இதழ்கள் ஒட்டுமொத்தமாக வாங்கப்பட்டுள்ளது. இதுதான் கருத்துரிமையின் லட்சணமா? 

    இதனால் எது மறைக்கப்படுகிறது என்று தெரியவில்லை. திருவாரூரில் இல்லாவிட்டாலும் வேறு ஊரில் கிடக்குமல்லவா? இதழுக்கு ஒன்றும் இழப்பில்லை. இதழைத் தொடர்ந்து படிக்கும் வாசகர்களுக்குத்தான் பெரும் இழப்பு.

    இவ்வாறு அதிகாரம் படைத்தவர்கள், பணம் இருப்பவர்கள் தங்களுக்கு எதிரான கருத்துக்களை முடக்கிவிடலாம். ஆனால் சாமான்ய மனிதர்களைப் பற்றிய செய்திகள் வரும்போது அவர்களால் அவற்றைத் தடுக்கமுடியுமா? தற்போது ஆம்பூர் சட்டவிரோதக் காவல் மரணம், அதைத் தொடர்ந்த கலவரங்களுக்கு காரணம் என்று சொல்லப்பட்ட பவித்ரா குறித்து என்னென்ன எழுதின? 

    குறிப்பாக ‘தினமலம்’ (தினமலர் பத்தரிக்கையை பலர் இவ்வாறு அழைப்பதுண்டு.) நாளிதழ் மாய்ந்து மாய்ந்து எழுதியது.  நீதிபதி கூட இந்தப் பொதுப்புத்திக்குப் பலியானார். இம்மாதிரியான எத்தனை பவித்ராக்கள் உங்கள் எழுத்துக்கு இரையாகிறார்கள்?

  ஒரு பிரபல தமிழ் நடிகைக்கு  எய்ட்ஸ் என ஓர் முன்னணி வாரமிருமுறை இதழ் ‘நக்கீரன்’ செய்தி வெளியிட்டது. இதைப்போல எண்ணற்ற உதாரணங்களைச் சொல்லிக்கொண்டே போகலாம். பத்தரிக்கை மற்றும் காட்சி ஊடக  கனவான்களே இதுதான் ஊடக தருமமா? என்று ஒரு கணம் யோசிங்கள்! சாமான்ய மக்களை இழிவு படுத்தாதீர்கள். அதிகார வர்க்கத்தை அம்பலப்படுத்துபோது இம்மாதிரியான முடக்கங்களை எவ்வாறு எதிர்கொள்வது பற்றிய படிப்பினைகளாவது பெற்றுக்கொள்ளுங்கள்.

  சம்மந்தப்பட்ட கட்டுரையை இணையத்திலும் பிற சமூக வலைத்தளங்களிலும்  அனைவரும் பார்க்கும் வண்ணம் வெளியிடுவதே  இதை எதிர்கொள்ளும் ஒரே வழியாக நான் கருதுகிறேன்.